Schorsch babbelt
21.06.2019
Diesen Artikel
21.06.2019 05:00
Drucken Vorlesen Senden
Leserbrief
26

. . . iss emol gschboannd, woas dodebei rauskumme dudd, woannse die oaner Woch iwwer die B 38a vehoannle douhn. Isch hebb jo faschd nimäi drouh glaawe wolle, dass isch dess noch erläwe derf: Oam Dunnerschdoach werds sisch in Kassel rausschdelle, ob die Schrooß jedz endlisch gebaud werd – orre nedd! Alla guud: Vielleischd werds a Freidoach wärn, bissme dess weiß werd – die Unnerlaache iwwer die Umgehungsschdrooß vunn Merleboch douhn sisch jo in Kassel oam Gerischd iwwer drei Schdockwäige schdaable. Bisme die all doischgeguckd hodd, konns schunn emol zwa Doach dauern.
 Sou loangsoam dudd dess jo bressiern: Woanns noch e Weil gäihd, misse die in Merleboch die Doofel ausdausche, uff dere ougezeigd werd, wie loangs her iss, seid alle gemoand häwwe, es gäihd glei lous midde Schdroos. Sällemols, alse middem mords Brimboores die Ploanfeschddellung unnerschriwwe häwwe. Jedz douhn ball die vier Schdelle uff dere elekdrische Doofel nimäi loange, um ouzuzeije, wieveel Doach dess her iss.
 Domols hoddme uns jo weiß mache wolle, dass oam negschde Doach die Bagger rolle, e paar Woche druff de Bundespräsidend sälwerd ess Boand doischschneide dudd unn die erschde Leid im Weschedzdoal sisch wunnern douhn, wie frieh se uff oamol vum Schaffe dehoam sinn, ohne Schdau.
 Blouß emol ougenumme, dass die vunn dem Gerischd in Kassel die oaner Woche soache: „Alla guud, ehr kennd dodemid oufoange, die Schdroos zu baue!“ Vielleischd iss die doann jo in drei Johr ferdisch – genau doann, woannse in Merleboch wärre iwwer dess Gewerwegebied dischbediern derfe. Sou loang misse die jo dodemid waade, nooch dem Bürgerendscheid. Äwwer doann dehd dess Gebied jo genau oan dere neie Schdroos laije! Vielleisch säigdme sisch doann: Uff die paar Schubbe kimmds jedz a nimäi ou.
 Vielleischd dauerd dess midd dere Schdroos äwwer a sou loang, dassme allminoaner bis dordhie lengschd mimm Flugtaxi doischs Weschedzdoal flieje, alle Schdroose leer sinn unnme iwwerläije dudd, woasme gäije den Schdau oam Himmel mache kennd! Wer waas?


Bis zum Negschdemol,
eiern Schorsch

SOCIAL BOOKMARKS
21.06.2019 05:00
Drucken Vorlesen Senden
Ihre Meinung interessiert uns