Schorsch babbelt
09.08.2019
Diesen Artikel
09.08.2019 05:00
Drucken Vorlesen Senden
Leserbrief
110

. . . hodd grouße Aache gemoachd, wierrer die Woch geläse hodd, dass oam Leerzebescher Boahnhouf woas nei gemoachd werd. Wie isch als frieher mimm Zuck vunn Feerd in die Schul nooch Rimboch gfahrn binn, do hodd die Eiseboahn noch in Fahmoch gehoalde. Jedz mach isch mehr enn Kobb driwwer, woas do seidher oannerschd worn iss. Isch moan: Fahmoch unn Leerzeboch – die laije jo noch immer oan de gleisch Schdell wie sällemols – unn der Boahnhouf, soweid isch waas, a!
 Isch muss jedz emol ehrlisch soi: Midde Eiseboahn binn isch schunn e Weil nimäi Rischdung Woinem gfharn. Unn woann, heb isch nedd sou rischdisch aussem Fenschder geguckd – me kennds jo, woas do drauß iss. Vielleischd häwwe die midd de Schiene jo äijendwoann Schlenker nooch Leerzeboch gemoachd unn desdewäije hodd Fahmoch jedz koan Boahnhouf mäi.
 Dess iss jo wäiklisch schunn immer es bissel iwwerzwäisch gewäse: De Zuck iss nooch Fahmoch gfahrn – äwwer ausgschdiehe issme in Leerzeboch. Uff alle Fäll hoddme des Gfiehl kadde. Wou do genau die Grenz iss, dess hoddme sälwerd jo nie sou rischdisch gewissd.
 Isch hebb die goanze Johrn gemoand, die Grenz wär de Boahniwwergoang: Uff de oa Seid vunn de Schiene Leerzeboch, uff de oanner Seid Fahmoch. Do konnschde doann im Zuck nooch links orre nooch räschds gucke – groad, woas de liewer iss. Äwwer schoinds dudd dess sou nedd schdimme. Ess machd jo a koan Sinn: Die Fahmesche unn die Lerzebescher häwwe ehr Grendschdoa jo loang in die Wies gebriggeld kadde, bis die Eiseboahn gebaud worn iss. Dess wär jo enn schäine Zufall gewäse, woannse die Schiene genau uff de Grenz veläigd hehn.
 Alla guud: Leerzeboch unn Fahmoch hodd e gemoinsoami Feierwehr, enn gemoinsoame Chor . . . Warum solle die koan gemoinsoame Boahnhouf hou? Orre me daald die Schiene, machd uff jedere Seid enn Boanschdeig unn wer nooch Fahmoch will schdeigd links aus unn wer nooch Lerzeboch will, räschds. Haubdsach, die Leid fahrn mimm Zuck!
Bis zum Negschdemol,
eiern Schorsch

SOCIAL BOOKMARKS
09.08.2019 05:00
Drucken Vorlesen Senden
Ihre Meinung interessiert uns