Merleboch: Emol gucke, wie aigs wegem Tunnel rumbeld
De Schorsch iss gschboand, wous lous iss, woann die Tunnel gschbrengd wärn.
Merleboch. De Schorsch hodd soim Froind, emm Hoannes aus Merleboch, e paar Ohnschdebbsel uff de Gebordsdoach gschenkd. Wou bei dem oan de Schosee wiesawie doch ball gschbrengd wärd. Do derfme jo emol gschboannd soi, ob do wäiklisch nedd rumble dudd, woanns midd denne Tunnel lousgäihd. Die misse jo enn Haufe Gschdoa aussem Wäg schaffe, dasse doisch denn Bäig doischkumme. Do wärds e paar Mol oam Doach krache.
Die wous wisse missde soache jo, dassme dodevu nix middkrieje wärd – a woannme glei näwedrou wohne dudd. Weil dess sou iss, wie midd de Knallerei oan Neijohr: Woannde enn Haufe kloane Kracher hinnenoanner louslosse duschd, dauerds leenger, ess Gschärr bleibd äwwer im Regal. Woannde äwwer oan grouße Schloach uff oamol fabriziern duschd, doann wackeld die Buud!
Unn sou wolle die dess a bei denne Tunnel mache. Schdadd denn halwe Bäig uff oan Schloach nauszubumbe, mache die oinische klaone Lescher unn douhn die hordisch hinnenoanner schbrenge. Ougeblisch haachd dess genausou in denn Fels noi. Woannde veel kloane Knaller in de Briefkaschde schdobbe duschd, iss der oam Enn jo genau sou kabudd, wie vunn oam grouße Schinakracher!
No ja – isch binn emol gschboannd, woas de Hoannes vezäihle wärd, woanns lousgoange iss. Woanns Haisel wackle dudd, wärd dess jo jussdamend in die Schweiz iwwerdroache unn dord sidzd doann Oaner, der waaß, wie aig dess gerumbeld hodd. Wahrschoinlisch, weil die in de Schweiz schunn sou veel Tunnel häwwe, unn sisch dodemidd guud auskenne, wieme Lescher oam Gscheidschde in de Bäig noi kriggd.
Mundart-Kolumne „De Schorsch“
„De Schorsch“ ist eine Mundartkolumne, die jeden Samstag in der Odenwälder Zeitung erscheint. Autor ist WNOZ-Redakteur Wolfgang Arnold, der im Odenwald aufgewachsen ist - und für den das Hochdeutsche in der Schule die erste Fremdsprache war. Als Kabarettist und auf der Fastnachtsbühne pflegt er das „Ourewällerische“ und setzt sich für den Erhalt und die Verbreitung der Mundart ein.
Die Emma, emm Hoannes soi Fra, hodd uff alle Fäll emol ess goanze Gschärr inn de Kisch uff de Boode gehockd. Me waas jo nedd, obb die sisch vielleischd erschd emol oischieße misse orre sou. Unn die denkd sisch a: Bevor die in de Schweiz weiß wärn, dass unser Haisel zu aig gewackeld hodd, sinn moi Deller schunn lengschd in Schärwe.
Alla kumme die Sache aus de Schränk raus unn die Schdebbsel ins Ohr noi – unn me gucke erschd emol, obbme woas heern douhn! Unn woanns uff oamol goanz hell schelle dudd, doann häwwese im Bäig die silwerne Glocke gfunne, diese in Merleboch seiddem dreißischjährische Kriesch suche ouhn!
Bis zum Negschdemol,
eiern Schorsch
