"De Schorsch": Zum Glick iss der Boahnhouf in Rimboch jedz oigeweihd
De Schorsch iss frouh, dass koans mäi hoamlisch ou- unn ausschdeije muss.
Rimboch. De Schorsch iss heilfrouh, dass der neie Boahnhouf in Rimboch jedz endlisch oigeweihd iss! Dess mussme sisch emol iwwerläije: Do held seid Auguschd schunn die Eiseboahn ou – unn eigendlisch dudds die Schdaddsion noch garnedd gäwwe. Alle Leid, die do seidher oam Zugg noi- unn nausgoange sinn, häwwe dess hoamlisch mache misse! Oa Glick, dasse oam Dunnerschdoach dem Elend e Enn gemoachd, unn denn Boahnhouf endlisch offiziell freigäwwe häwwe.
Sou isses hoald: Sou loang koa Boand doischgschnidde worn iss, koa Redde gehoalde sinn und koa Foddo gemoachd, sou loang sinn sou Sache hoald noch nedd rischdisch ferdisch. Me konnse zwar nudze, äwwer es dudd sisch äijendwie schoufel oufiehle – sou als woannme woas mache dehd, woasme eigendlisch nedd derf.
Mundart-Kolumne „De Schorsch“
„De Schorsch“ ist eine Mundart-Kolumne, die jeden Samstag in der Odenwälder Zeitung erscheint. Autor ist WNOZ-Redakteur Wolfgang Arnold, der im Odenwald aufgewachsen ist - und für den das Hochdeutsche in der Schule die erste Fremdsprache war. Als Kabarettist und auf der Fastnachtsbühne pflegt er das „Ourewällerische“ und setzt sich für den Erhalt und die Verbreitung der Mundart ein.
Isch kenndme denke, dass die goanze Lokfiehrer, woannse Rischdung Rimbescher Schul kumme sinn, als riwwer unn niwwer gucke häwwe misse, dasse koans siehd, woannse oan emm uoigeweihde Boahnhouf ouhoalde unn Leid oi- unn ausschdeije losse. Woann do woas bassierd – wer bezäihld doann defeer?
Unn me muss sisch emol vorschdelle, die Mädschen unn Buwe, die oan die Schul laafe, wärn gfrogd, wouse groad herkumme! Bis awwel häwwe die jo nix Gscheides dodezu soache kenne. Vunn emm Boahnhouf, denns noch garnedd rischdisch gäwwe dudd? Do wärdme jo glei fer dabbedd gehoalde.
Oa Glick muss jedz koans mäi hoamlisch dou: De neie Boahnhouf iss oigeweihd unn koans muss sisch mäi veschdeckle, beim Oi- unn Ausschdeije!
Bis zum Negschdemol,
eiern Schorsch
